Hofu imetanda kwenye Vijiji vya Kibaoni
na Olasiti Wilayani Babati Mkoani Manyara na Mswakini Wilayani Monduli Mkoani
Arusha, baada ya simba wawili wa hifadhi ya Tarangire kudaiwa kuonekana
wakizunguka vijiji hivyo.
Hali hii imejitokeza baada ya
wiki iliyopita simba sita kuuawa na wananchi wa vijiji vya Kibaoni na Olasiti kwa
kile kinachodaiwa kuwa ni kuonyesha ufahari wa ujana, huku wafugaji watano
wakijeruhiwa na simba katika tukio hilo.
Kutokana na hali hiyo jana na juzi
wana vijiji wa maeneo hayo walionekana wakitembea kwa makundi huku wakiwa na
silaha za jadi ikiwemo fimbo, sime na mikuki, kwa lengo la kujilinda pindi wakikutana
na simba hao.
Hata hivyo, wakizungumza na
waandishi wa habari jana wakazi hao walidai kuwa Serikali imekuwa ikitumia nguvu
kubwa pindi wanyamapori wanapouawa na kutochukua hatua yoyote pale wanyamapori
wanapozuru binadamu.
Walisema wanyamapori wanapoua
binadamu, mifugo au kuharibu mazao, hakutolewi tamko lolote, ila baada ya
wanyamapori kuuawa Waziri wa Maliasili na Utalii Lazaro Nyalandu amekuwa akitoa
matamshi ya kuwatisha wafugaji.
Mkazi wa Olasiti Saning’o Ole Nigi
alisema jamii inayozunguka wanyamapori wanaishi kwa hofu, ila wao ndiyo walinzi
wa wanyamapori kwa miaka yote kwani hakujawahi kutokea tukio la ujangili
lililofanywa na wafugaji.
“Wanyamapori wamekuwa tishio sana
kwa wananchi na sisi ndiyo walinzi wakuu wa wanyamapori wa Tarangire kwani wanatuzunguka
kila wakati ila Waziri awe anachunguza kwanza jambo kabla ya kutoa kauli,”
alisema Ole Nigi.
Naye, Kaimu Kamanda wa polisi wa
mkoa wa Manyara, Mrakibu Mwandamizi (SSP) Christopher Fuime, alithibitisha
wafugaji watano kulazwa kwenye hospitali ya wilaya ya Monduli wakidaiwa
kujeruhiwa na simba wiki iliyopita.
Aliwataja majeruhi hao kuwa ni Jackson
Saipei (30), Obeid Mollel (23), Jackson Mediteki (23), Karani Saimon (30) na
Leseilama Tobiko (28) wote wakazi wa kijiji cha Olasiti ambao wanadaiwa
kutoroka hospitali wakihofia kukamatwa kwa kuua Simba hao.
Simba sita waliotoka nje ya Hifadhi ya Taifa ya Tarangire na
kuingia eneo la Kijiji cha Kibaoni wilayani Babati mkoani Manyara, wameuawa kwa
kuchomwa mikuki na wananchi.
Kijiji cha Kibaoni kipo hatua chache kutoka Hifadhi ya Tarangire
ambayo ni mojawapo ya vivutio vya kitalii na mara nyingi wanyamapori huzagaa
kijijini hapo, hasa nyakati za masika kuepuka majani marefu hifadhini.
Tukio hilo linaloelezewa kuwa ni janga kubwa kwa sekta ya uhifadhi
na utalii nchini, lilitokea jana alfajiri na hadi Saa 6.00 mchana na mizoga
saba ya Simba ilipatikana, huku mmoja akiaminika kufia kwenye vichaka baada ya
kukimbia alipojeruhiwa.
Waziri wa Maliasili na Utalii, Lazaro Nyalandu ameziagiza mamlaka zinazohusika
kuwasaka na kuwatia mbaroni wote waliowahamasisha na kuwaongoza wakazi wa
kijiji hicho kuwaua Simba hao.
Akizungumza na waandishi wa habari jijini Arusha, Nyalandu
alitoa maagizo kwa polisi kuchunguza uhalali wa bunduki inayomilikiwa na mmoja
wa wakazi wa kijiji hicho iliyotumika kuwaua Simba wawili kati ya saba.
“Kuua idadi kubwa ya Simba kwa wakati mmoja, tena katika siku ya
kwanza ya Mwaka Mpya ni jambo la kusikitisha na linastahili kulaaniwa na wote
wenye mapenzi mema na uhifadhi ndani na nje ya nchi,” alisema Nyalandu na
kuongeza:
“Hatuwakamati wakazi wote 100 walioshiriki kuwaua simba hawa, bali
tutashughulika na wale waliochochea mauaji ili kutoa fundisho kwa wale
wanaochukua sheria mkononi kwa kuwaua wanyamapori,” alisema Nyalandu.
Hifadhi ya Taifa ya Tarangire inakadiriwa kuwa na Simba kati ya
200 hadi 250 na Tembo wanaokadiriwa kufikia 3,000 na wanyama wengineo zaidi ya
10,000.
Mmoja wa wanakijiji aliyezungumza kwa sharti la kutotajwa jina
gazetini kwa sababu za kiusalama, alisema Simba hao waliuawa baada ya kudaiwa
kumla punda kihongwe kwenye moja wa maboma ya wakazi wa kijiji hicho ambao ni
jamii ya wafugaji wa Kimasai.
“Usiku kundi la Simba zaidi ya 12 walionekana wakizunguka katika
maeneo ya karibu na kambi ya Watalii ya Zion Campsite. Ilipofika alfajiri, watu
wakaanza kupiga mayowe kuashiria hatari baada ya Simba hao kusambaa kijijini,”
alisema na kuongeza;
“Kelele hizo ziliwashtua Simba na kuwafanya waanze kuunguruma,
hali iliyozua taharuki na vijana (Morani), wakaanza kupambana nao na kuwaua
mmoja baada ya mwingine hadi kufikia Simba saba na mmoja alikimbia akiwa na
mkuki mwilini.”
Alisema vijana wawili walijeruhiwa vibaya baada ya Simba mmoja
kuwashambulia.
Meneja Uhusiano wa Shirika la Hifadhi za Taifa (Tanapa), Paschal
Shelutete alisema mara nyingi mauaji ya wanyamapori wakali wakiwamo simba,
chui, chita huambatana na kisasi cha wafugaji baada ya mifugo yao kujeruhiwa au
kuliwa.
“Katika tukio hili, Simba hawakuvamia mifugo wala maboma ya
wafugaji.
“Hawa walionekana tu kijijini. hawakuwa na madhara, wamewaua kwa
makusudi,” alisema Shelutete.
Alisema hata kama kungekuwepo uvamizi, askari wa TANAPA wangefika
eneo hilo ndani dakika zisizozidi tano iwapo wangetaarifiwa kwa sababu eneo
hilo liko hatua chache kutoka makao makuu ya hifadhi ya Tarangire.
Mkuu wa mkoa wa Manyara, Joel Bendera, aliyeripoti kituo chake
hicho kipya cha kazi wiki iliyopita alitembelea eneo la tukio jana asubuhi na
kushuhudia mizoga ya Simba hao ambayo baadaye yalihamishiwa makao makuu ya
hifadhi ya Tarangire.
Kamanda wa polisi mkoa wa Arusha, Lebaratus Sabas licha ya kukiri
kupata taarifa za tukio hilo, alisema linapaswa kuzungumziwa ni Kaimu Kamanda
wa polisi mkoa wa Manyara, Mrakibu Mwandamizi Christopher Fuime. Eneo la tukio
liko mpakani mwa mikoa ya Arusha na Manyara.
Akizungumza kwa njia ya simu jana mchana, Kamanda Fuime
alithibitisha kutokea kwa tukio hilo na kuahidi kulizungumzia tukio hilo baada
ya kukamilisha ukusanyaji wa taarifa zote muhimu kutoka eneo la tukio.
Siri ya kuuawa simba sita waliotoka kwenye Hifadhi ya Taifa
ya Tarangire inayopatikana kwenye mikoa ya Manyara na Arusha imebainika na kama
ilivyoelezwa awali kwamba mauaji hayo yalifanywa na wananchi wa vijiji vya
Olasiti na Kibaoni wilayani Babati, Mkoa wa Manyara.
Mhifadhi Mkuu wa Hifadhi ya Tarangire, Stephano Qolli alisema kuwa
kutokana na uchunguzi wao wakazi wa vijiji hivyo hawana tabia ya kufanya
ujangili dhidi ya wanyamapori bali kitendo walichokifanya kililenga
kuonyesha ufahari wa kutambulika na jamii kwa kuua simba.
“Haya maeneo kuna ujangili ambao mara nyingi unafanywa na wananchi
kutoka nje ya eneo hilo, lenye jamii za Wamasai na Wamang’ati ambao kijana
akimuua simba anapata heshima kwa jamii inayomzunguka, anaonekana ni jasiri
anayeweza kulinda jamii yake dhidi ya hatari zote,” alisema Qolli.
Alisema kitendo walichokifanya hakikubaliki kwani kilionyesha nia
yao ilikua kuwaua simba hao na siyo kuwafukuza waondoke kwenye kijiji hicho,
baada ya kuwazingira na kuwashambulia kwa silaha za jadi hadi kufa simba wanne
huku wawili wakiuawa kwa risasi.
Mizoga ya simba hao ilionekana ikiwa imekatwa mikia na miguu baada
ya kuwaua jambo ambalo linatafsiriwa linalenga kuweka kumbukumbu ya ushujaa kwa
jamii hiyo. Waziri wa Maliasili na Utalii, Lazaro Nyalandu akizungumza na
waandishi wa habari Januari Mosi, mwaka huu jijini Arusha, alisikitishwa na
mauaji hayo ambayo alidai yameitia doa sekta ya utalii siku ya Mwaka Mpya.
