UWT MBULU YAWAPA MOYO KITUO CHA WAGONJWA NA WASIOJIWEZA BASHAY

 Mwenyekiti wa CCM Mkoani Manyara, Lucas Ole Mukus akimkabidhi mkurugenzi wa kituo cha wagonjwa na wasiojiweza wa Bashay Wilayani Mbulu Padri James Amnaay, mche wa sabuni kwa ajili ya kituo hicho pamoja na vyakula,nguo na sabuni vilivyotolewa na Jumuiya ya UWT Wilayani Mbulu katika wiki ya maadhimisho ya miaka 40 ya kuzaliwa chama hicho.

Viongozi wa Jumuiya ya UWT Wilayani Mbulu Mkoani Manyara, wakipanda mti kwenye shule ya sekondari Bashay, kwenye maadhimisho ya miaka 40 ya kuzaliwa CCM.

DC SIMANJIRO AWAASA WANANAISINYAI KUSHIRIKIANA NA TANZANITEONE

 Mkuu wa Wilaya ya Simanjiro Mkoani Manyara, mhandisi Zephania Chaula akizungumza na wananchi wa Kijiji cha Naisinyai kuhusiana na mahusianao mema na wawekezaji majirani zao kampuni ya TanzaniteOne.

 Ofisa mahusiano wa kampuni ya TanzaniteOne, Khalfan Hayesh akisoma mikakati ya kusaidiana kati yao na wananchi wa Kijiji cha Naisinyai, kushoto ni Mkurugenzi mtendaji wa kampuni hiyo Robert Grafen Greaney.

MAPADRI WATOA MSAADA KWA WANAFUNZI TARAFA YA EYASI

Padri Miguel Lozano akizungumza na wanafunzi wa shule ya sekondari Mang'ola Wilayani Karatu Mkoani Arusha, baada ya kutoa msaada wa vitabu 3,000 vya thamani ya shilingi milioni 30 akishirikiana na Padri Pepe.

Padri Miguel Lozano akigawa miongoni mwa vitabu 3,000 vyenye thamani ya shilingi milioni 30 akishirikiana na Padri Jose Torner Pepe wote wa shirika la Roho Mtakatifu Parokia ya Mangola kwa wanafunzi wa shule nne za sekondari za serikali Tarafa ya Eyasi Wilayani Karatu Mkoani Arusha.

MAPADRI WA MANG'OLA

Mapadri wa Mang'ola walivyoisaidia jamii kiroho na kimwili

Na Joseph Lyimo

Kwa asili yake Tanzania ni nchi iliyobarikiwa sana na Mungu. Ni nchi yenye rasilimali nyingi inayokaliwa na wananchi wanaounganishwa na utaifa wao na kwa hiyo kuendelea kuwa nchi yenye amani ya kudumu na hivyo kuwa nchi yenye kuaminiwa na kutumainiwa.

Wananchi wanaipenda nchi yao na majirani na nchi rafiki wanaipenda Tanzania. Tatizo ni kwamba yewezekana wengi wetu hatuujui ukweli huo na ikiwa

tunaijua, basi tunadeka na ama hatutambui uhalisia kwamba unapopendwa na wewe upendeke. Ukipendwa leo nawe ukakataa kupendwa, kesho ukipenda wewe, utakataliwa na hutapendwa.Kupendwa ni bahati na siyo haki ya kudaiwa popote!

Nchi yetu inazo nchi rafiki ambao zina urafiki wa kinafiki lakini pia inazo nchi rafiki ambazo ni marafiki wa kweli na wanaoitakia nchi yetu mema kupitia wananchi wao wanaokuja kutembelea nchi yetu, kuwaona watu na mifumo yao ya kijamii, maisha yao na changamoto zao.

Wapo pia wanaokuja kuona rasilimali na fursa za uwekezaji. Pia, wapo watu binafsi kutoka nchi hizo rafiki, ambao huguswa na changamoto za watu wetu nao huingiwa na ukarimu wa kutaka kutusaidia kuondokana na changamoto hizo.

Tanzania imebahatika kupendwa kwa dhati kwa takriban miaka 40 sasa yaani tangia Mwaka 1976 na mapadri wawili Jose Aguilar Torner na Miguel Angel Lozano ambao ni wa Shirika la Roho Mtakatifu kutoka nchini Hispania.

Mwananchi wa Kijiji cha Narakauwo Kata ya Loiborsoit Tarafa ya Emboreet Wilayani Simanjiro Mkoani Manyara, Lucas Ole Mukusi ambaye aliwahi kuwa diwani wa kata hiyo na hivi sasa ni Mwenyekiti wa CCM wa mkoa huo anasema kwa mara ya kwanza mapadri hao kufika kwao Tanzania walipewa kituo cha kazi Parokia ya Emboreet, katika mbuga za Tukutta.

Ole Mukusi anasema mapadri hao wawili walifanya kazi kubwa parokiani hapo kwa kujenga majengo ya kuishi mapadri na masista, majengo ya kutolea huduma ya uhakika ya afya, zahanati yenye kutoa huduma ya wagonjwa wa nje OPD na pia kulaza wagonjwa, vitanda 30, huduma ya afya ya mkoba, huduma ya afya ya uokoaji kwa njia ya ndege (Flying Doctors Service) na kuimarisha huduma ya maji kutokea kwenye chanzo hadi katika shule ya Msingi na kupanua mtandao hadi kituo cha Afya.

 Anasema mapadri hawa walifanya kazi Emboreet Simanjiro hadi mwaka 1983 ambapo Padri Jose Aguilar Torner (maarufu kwa jina la Pepe) alipohamia Engikaret-Monduli na PadrI Miguel Angel Lozano (Maarufu kwa jina la Oloronyo) akahamia Loliondo-Ngorongoro mnamo mwaka 1985.

Anaeleza kuwa huko Engikaret, padri Pepe alijenga nyumba za kuishi mapadri na masista, kuboresha shule ya makatekista kuwa sekondari kwa majengo na vifaa vya kufundishia, kujenga kanisa na zahanati ambako huduma bora na ya uhakika ya afya ilitolewa kwa mara ya kwanza.

“Wakati wote huo, dawa nyingi na vifaa vya kisasa vililetwa kutoka Hispania na mara kwa mara wataalamu wabobezi wa maradhi mbalimbali walifika kutoa huduma za rufaa kwa wagonjwa wa maeneo walikofanya kazi mapadri hao na kwa njia hii, maisha ya wagonjwa wengi yaliweza kuokolewa,” anasema.

Anaongeza kuwa mwaka 1993, mapadri hawa walikutanishwa tena ili kufanya kazi pamoja, baada ya askofu wa Jimbo la Arusha, kuwatuma kwenda eneo la Mang’ola Chini ili kuchochea maendeleo ya kiroho na kimwili jambo ambalo wamelifanya kwa takriban miaka 23 kwa ufanisi mkubwa mno.

Anasema mapadri hao wawili Pepe na Miguel ni wabunifu mno na viongozi wenye moyo mkuu katika kuwahudumia watu wao bila kujali imani ya jamii ya maeneo ambako wanatoa huduma ya kiroho.

Huduma za kitaalamu za afya na mambo mengine.

Mapadre wa Mang’ola-chini, Pepe na Miguel ni watu ambao daima hufikiria njia za kupambana na matatizo yanayowakabili watu wao, katika kufanya hivyo, hukabiliwa na changamoto za ubabe na ukorofi wa baadhi ya viongozi na wanasiasa wenye mwelekeo usiokuwa na manufaa kwa jamii ya Mang’ola na Tanzania kwa ujumla wake, jambo ambalo huwawia vigumu mapadri hawa kukubaliana nalo.

Ole Mukusi anasema katika kuboresha utoaji wa huduma za kiafya, mapadri hawa wamejenga mahusiano na mashirika yenye kutoa huduma kwa mfano wataalamu wa meno, mifupa na masikio kutoka nchi ya Hispania.

Anasema wataalamu hawa huja kwa makundi yenye kutofautiana kwa ukubwa na kipindi cha kuja Mang’ola na idadi ya wataalamu katika makundi haya ni kuanzia watu nane hadi 16 na kwamba wanayapokea makundi matatu hadi manne kwa mwaka.

“Licha ya kuwa CBO ya WAVIU inalo Trekta, ambalo hulitumia kukodishia wakulima ili kupata fedha, mapadre huwapatia WAVIU huduma ya afya bure pamoja na chakula, mapadre hao wameanzisha CBO kwa ajili ya jamii ya Wahadzabe katika kuwasaidia waweze kupata mahitaji ya muhimu ya kibinadamu, kupitia utalii unaofanywa katika maeneo yao,” anasema.

Anasema kuwa mapadri hao wamewezesha uanzishaji wa shule mbili za awali kwa nia ya kuunga mkono juhudi za serikali za kuwapatia watoto wa wananchi wa Mang’ola elimu.

Anasema kwa nyakati ambazo wataalamu wa huduma za rufaa kutoka Ulaya hawapo, kila inapolazimu mgonjwa anahitaji huduma ya dharura, gari la wagonjwa humsafirisha mhusika kwenye huduma Arusha au KCMC Mkoani Kilimanjaro na mara zingine Dar es salaam.

Anasema mapadri hao wamejenga mahusiano na shirika la La Arruzafa Foundation yenye makao yake Cordoba Hispania ambayo hufanya huduma mbalimbali za macho, ambapo wataalamu kutoka taasisi hiyo walifika Mang’ola mwaka jana na kwa wiki moja walihudumia wagonjwa wa macho 736 kati yao wagonjwa 600 walipewa miwani ya thamani kati ya sh65,000 na sh90,000 ya kuonea, kusomea na ya kukinga mionzi mikali ya jua.

Anasema upasuaji mkubwa ulifanyika mara 74 na zote zilifanyika vizuri na kwa muda wote huo, La Arruzafa Foundation iliwalipa watumishi wa kituo cha afya Mang’ola, posho zao za siku na zile za ufanyaji kazi wa ziada na kuwapatia huduma za chakula na malazi wagonjwa wasio na uwezo wa kujikimu au kujihudumia malazi na chakula.

“Upasuaji huo ulifanyika katika chumba cha upasuaji iliyosheheni vifaa vingi vya kisasa ambavyo wataalamu hao hupenda kushirikiana na wataalamu wetu wa wilaya na mkoa ili kuwajengea uzoefu katika matumizi ya vifaa hivyo,” anasema na kuongeza;

“Hata hivyo, kuna hofu kuwa wanafunzi wengi wa Mang’ola wanakabiliwa na uoni hafifu nyakati za giza kutokana na hali ya kijiografia na hivyo kuwa sababu ya wanafunzi wengi kupatiwa miwani ya kupunguza ukali wa mionzi mikali ya jua.”

Anasema mapadri wamewezesha uanzishaji wa shule mbili za awali kwa nia ya kuunga mkono juhudi za serikali za kuwapatia wananchi elimu na kwa nyakati ambazo wataalamu wa huduma za rufaa kutoka Ulaya hawapo, kila inapolazimu

kwamba mgonjwa anahitaji huduma ya dharura, gari la wagonjwa humsafirisha mhusika kwenye huduma Arusha au KCMC mkoani Kilimanjaro na mara zingine Dar es salaam.

Jamii ya Mang’ola yawazungumzia mapadri hao

Mmoja kati ya wakazi wa eneo hilo Antony John anasema japokuwa suala la kufanikisha maendeleo ya jamii ikiwemo shule, maji, miundombinu, afya ni jukumu la serikali, lakini viongozi hao wa dini wamejitahidi kwa uwezo wao kufanikisha hayo.

“Kutokana na hali hiyo viongozi hawa wa kiimani wanapaswa kukumbatiwa na kuungwa mkono kwani kwa muda wote waliokuwa hapa Mang’ola wametuonyesha kuwa wao ni watu wa maendeleo na wamebadili eneo hili likawa na maendeleo ya kutosha,” anasema John.

Hamisi Bakari mkulima wa vitunguu anasema mapadri hao wamekuwa wanatoa msaada kwa jamii ya eneo hilo bila kubagua dini au madhehebu hivyo serikali inapaswa kuwapa ushirikiano wa kutosha kupitia maendeleo wanayofanya katika eneo hilo la Mang’ola.

“Japokuwa wenyewe ni mapadri wa kanisa katoliki lakini wamefanikisha ujenzi wa msikiti kwenye eneo letu la Mangola hivyo kuunganisha mioyo ya watu wa madhehebu mengine na kitendo hicho kimetufanya tuwe ndugu moja japokuwa sisi ni watu wa imani tofauti,” anasema Bakari.

Rai kwa Rais John Magufuli

Ole Mukusi anasema pamoja na ukweli kuwa mapadri hawa wa Shirika la Roho Mtakatifu wamekuwepo nchini kwa takriban miaka 40 yaani kipindi muhimu cha maisha yao, hadi sasa bado wanakabiliwa na changamoto ya kupatiwa vibali vya kuishi hapa nchini ili kuwahudumia Watanzania bila wao kupata faida

yoyote binafsi.

“Kwa miaka yote waliyowatumikia watu wetu, bado wanaendelea kama vile ndio wanakuja leo nchini na kwa hiyo wanapatiwa kwanza visa ya kitalii ili hali mapadre hawa wanaisaidia serikali yetu katika kutekeleza jukumu la kuihudumia jamii yetu kiroho, kielimu na kiafya,” anasema.

Anaeleza kuwa mapadri hawa hupata usumbufu mkubwa kila wanapoomba vibali vya wataalamu wa afya kuingia nchini ili kutoa huduma ya bure kwa Watanzania.

“Pia wao huchukua muda mwingi kuvipata vibali hivi ambavyo hulipiwa fedha nyingi bila hata kujali kwamba wataalamu hawa wanakuja kuokoa bure maisha ya jamii ya Tanzania,” anasema Ole Mukusi.

Anasema Mungu anatutumikia kupitia wataalamu hawa na ndiyo sababu

wanaihudumia Tanzania kwa upendeleo mkubwa kwani wamefanya kazi nchini Benin miaka miwili, Equatoria Guinea miaka mitano, Madagascar miaka saba na Tanzania miaka 11 na bado wana nia na moyo wa kuendendelea kutoa huduma.

“Hapa kwetu, wanawapatia jamii huduma zao bure kwa kutumia vifaa walivyotoa kama msaada pamoja na kwamba vipo vingine ambavyo wanakuja navyo na kurudi navyo kutokana na kwamba watu wetu hawana taaluma ya kuvitumia,” anaeleza.

“Rais wetu Dk John Magufuli ni mtu mwenye moyo wa huruma na shukrani, mwenye kutambua na kuthamini kazi nzuri inayofanywa, ndiyo sababu yake ya kutumia Kauli Mbiu ya ‘hapa kazi tu’ namuomba Rais wetu mpendwa atembelee Mang’ola ili apate kujionea kwa macho yake mwenyewe kazi na historia njema ya ufanisi inayofanywa na mapadri hawa,” anasema na kuongeza;

“Ninaiomba Serikali yetu ifanye marekebisho ya kimfumo ili kurahisisha mchakato wa upatikanaji wa vibali kwa watu wa mataifa mengine wenye nia njema ya kuisaidi nchi yetu.”

Anasema kupitia kwa viongozi hao wa dini wamefanikisha miradi mbalimbali ya maendeleo kwenye eneo la Mang’ola yenye thamani ya sh5,973,661,000 ikiwemo ujenzi wa madarasa 40 ya shule za msingi zilizotumia sh400.5 milioni, ujenzi wa Nyumba 35 za walimu sh350.7 milioni, ujenzi wa shule ya sekondari ya wasichana sh2.3 milioni, ujenzi wa ukumbi na ofisi nne za vijiji na nne za kata sh85 milioni.

Anasema ukarabati wa shule 11 za msingi kwenye Tarafa ya Mang’ola sh301.5 milioni, ujenzi wa Kituo cha afya sh1.2 bilioni, ufadhili wa fedha za uendeshaji wa kituo cha afya kila mwaka sh160.6 milioni, kukarabati kituo cha polisi sh3.1 milioni na kuchangia ujenzi wa msikiti sh25.8 milioni.

Pia, wamefanikisha ujenzi wa nyumba tano za watu wasiojiweza kwa gharama ya sh25 milioni, ununuzi wa trekta na vifaa vyake kwa CBO ya WAVIU sh62.8 milioni, kuhudumia kikundi cha wazee, wajane na wagane 25 sh23.4 milioni na kujenga ukumbi na bwalo la magereza sh25 milioni, ununuzi wa vitabu vya shule za msingi Tarafa ya Mangola sh75.3 milioni.

Anasema wamefanikisha ununuzi wa madawati kwa shule za msingi kwenye tarafa hiyo sh75 milioni, ujenzi wa mradi wa maji ambapo kuna mtandao wa miundombinu wenye umbali wa Kilometa saba sh300.7 milioni, ununuzi wa vitabu vya shule nne za sekondari kwa mwaka 2016 sh30.1 milioni, ujenzi wa kanisa katoliki lenye uwezo wa kuingia watu 1,500  sh1.800 bilioni.

“Pia kuna ujenzi wa makanisa matano katika vigango sh250.5 milioni, ujenzi wa kituo cha masista wafanyao kazi za afya na shuleni sh180.6 milioni, ujenzi wa karakana ya mafunzo ya useremala kwa vijana sh21.9 milioni, ununuzi wa vifaa katika karakana ya useremala sh200.6 milioni,” anasema Ole Mukusi.

Anasema pia ujenzi wa Kituo cha mafunzo kwa wasichana sh62.9 milioni, ujenzi wa maghala 12 ya kuhifadhia vitunguu katika vijiji saba sh180.8 milioni, kuwasomesha vijana 55 chuo kikuu sh125.9 milioni, vyote vimegharimu zaidi ya sh5.9 bilioni, ikiwa ni michango ya watu wa Hispania kwa watanzania muda ambao mapadre hao wamefanya kwenye parokia yao Mang’ola.

Anasema kwa muda waliofanya kazi Parokia ya Mang’ola mapadre hao Pepe na Miguel wamewezesha miradi hiyo iliyogharimu fedha hizo shilingi 5,973,661,000  ambayo ni michango ya watu wa Hispania kwa Watanzania waliopo Tarafa ya Mang’ola.

KAMPENI YA UDIWANI KATA YA DURU BABATI

Mgombea udiwani wa Kata ya Duru Mkoani Manyara, Ally Shaban (Chadema) akifurahia wakati wa kampeni yake jana kwenye Kijiji cha Gesbert (kulia) ni Mbunge wa jimbo la Babati Mjini Pauline Gekul.

Mgombea udiwani wa Kata ya Duru Wilayani Babati Mkoani Manyara, Jackson Haibei (CCM) akizungumza jana wakati akijinadi na kuomba kura kwa wananchi wa Kijiji cha Hoshan.

LOSOITO WAPATIWA MAJI NA TANZANITEONE

Kaya 277 za wananchi 1767 wa Kijiji cha Losoito, Wilayani Simanjiro Mkoani Manyara, wenye tatizo kubwa la ukosefu wa maji, wanatarajia kuondokana na changamoto hiyo baada ya kampuni ya TanzaniteOne kuwapatia maji.

 

Ofisa mahusiano wa kampuni ya madini ya Tanzanite ya wilayani humo TanzaniteOne Halfan Hayeshi akizungumza alisema hivi sasa mradi huo umefikia asilimia 85 ili umalizike na kuzinduliwa ila wanachi wanapata maji.

 

Hayeshi alisema wananchi wa eneo hilo wanaendelea kupata huduma ya maji ila mradi kamili haujakamilika kwani wanahitaji kuweka mabomba urefu wa mita 500 ili kufikisha maji hayo karibu zaidi na jamii eneo la shule ya msingi Losoito.

 

“Tunatarajia kuweka mabomba ya urefu wa mita 500 ili kufikisha mradi huu karibu zaidi, ila hivi sasa wananchi wanapata huduma hiyo ya maji kwani awali tuliambiwa tufikishe mradi huo kwenye eneo la sasa ulipo,” alisema Hayeshi.

 

Alisema wanatarajia kuzindua mradi huo hivi karibuni baada ya kuwapa taarifa Katibu tawala wa mkoa huo Eliakim Maswi na mkuu wa wilaya hiyo Zephania Chaula, ambao ndiyo wataukabidhi kwa wananchi wa kijiji hicho cha Losoito.

 

Alisema mifugo na jamii ya eneo hilo hivi sasa wanafaidika na huduma hiyo ya maji na mara baada ya kununuliwa kwa rola sita za mabomba ya maji yatakayoweza kuwekwa katika mita 500 zilizobaki yatafika kwenye shule hiyo.

 

Ofisa mtendaji wa kijiji hicho Ngatayai Mollel alishukuru uongozi wa kampuni ya TanzaniteOne kwa kufanikisha mradi huo wa maji, utakaowasaidia wananchi wa eneo hilo, ambao kwa muda mrefu walikuwa wanakabiliwa na tatizo la maji.

 

Mollel alisema kijiji hicho kilichoanzishwa mwaka 2009 hivi sasa kina wakazi 1767 chenye kaya 277 kilikuwa na wakati mgumu wa kupata huduma ya maji ila hivi sasa wananchi wameondokana na changamoto ya maji iliyowasumbua.

 

Hata hivyo, alitoa ombi la wananchi wa eneo hilo kujengewa zahanati kwani inawalazimu kutembea umbali mrefu kupata huduma ya afya pindi wanapougua hivyo kuwa tatizo hasa kwa wanawake na watoto.

 

Mmoja kati ya vijana wanaolinda mradi huo wa maji ili mabomba yasiibiwe Daniel Solomon, alisema wamepeana zamu ya kulinda kila siku watu watatu ili miundombinu isiharibiwe na jamii ya eneo hilo ifaidike na maendeleo hayo.

 

“Wakina mama walikuwa wanatembea umbali mrefu wa kilomita 20 kila siku kwenda na kurudi mji mdogo wa Mirerani, kwa kutumia wanyamakazi punda, ila hivi sasa wanaondokana na tatizo hilo la muda mrefu,” alisema Solomon.

 

HAPPY BIRTHDAY HAPPY KAYUMBO

Heri ya siku yako ya kuzaliwa Happy Kayumbo, uishi miaka mingi yenye Baraka tele.

VODACOM YATOA MSAADA KITUO CHA WAZEE SARAME MAGUGU BABATI MANYARA

Meneja ruzuku na mawasiliano wa Vodacom Tanzania Foundation, Sandra Oswald, akimkabidhi, mmoja kati ya wazee wa kituo cha wazee na wasiojiweza Sarame Magugu, Wilayani Babati Mkoani Manyara, Maalim Masaja chandarua, ambapo waliwakabidhi wazee hao mashuka, vyandarua, vyakula, dawa na mahitaji mengine yenye thamani ya zaidi ya sh10 milioni.

Meneja ruzuku na mawasiliano wa Vodacom Tanzania Foundation, Sandra Oswald, akimkabidhi Khadija Omari, mmoja kati ya wazee wa kituo cha wazee na wasiojiweza Sarame Magugu, Wilayani Babati Mkoani Manyara, shuka na vyandarua, baada ya kukabidhi msaada wa vyakula, dawa na mahitaji mengine yenye thamani ya zaidi ya sh10 milioni.

TUZO UTUNZAJI MAZINGIRA

 

Mkuu wa Babati ya Babati Raymond Mushi akiwa ameshika tuzo ya utunzaji mazingira aliyokabidhiwa na Mkuu wa Mkoa wa Manyara, Dk Joel Bendera

 

Mkuu wa Mkoa wa Manyara, Dk Joel Bendera akiwa amemkabidhi Katibu Tawala wa Mkoa huo Eliakim Maswi tuzo ya utunzaji mazingira

WATAKIWA KUONDOA MIGOGORO MANYARA

 Mkuu wa Mkoa wa Manyara, Dk Joel Bendera amewataka viongozi wa Wilaya kuhakikisha wanashirikiana ipasavyo ili kutatua migogoro ya ardhi inayorudisha nyuma maendeleo kwani robo tatu ya mkoa huo imegubikwa na migogoro.

 

Dk Bendera akizungumza mjini Babati kwenye mafunzo elekekezi kwa viongozi wa wilaya za mkoa huo alisema, migogoro ya ardhi kwa kiasi kikubwa ndiyo kikwazo cha maendeleo hivyo watumie uwezo wao wote ili kuimaliza.

 

Alisema kila kiongozi kwa nafasi yake anapaswa kuhakikisha anasimama vyema katika kutekeleza majukumu zaidi kwani migogoro mingi inaweza kumalizika endapo itatiliwa maanani kwenye utekelezaji ili kupiga hatua ya maendeleo.

 

Alisema migogoro ya ardhi ambayo imetawala kwenye robo ya sehemu ya Manyara inapaswa kumalizika kwa kuhakikisha viongozi wote wa wilaya wanawajibika kumaliza migogoro hiyo isiyokuwa na faida yoyote.

 

“Tunapaswa kutimiza wajibu wetu ipasavyo kwa kuhakikisha viongozi wa kisiasa na watendaji wanatumia nafasi zao kikamilifu ili kumaliza migogoro hiyo ambayo haina manufaa kwa wananchi tunaowaongoza,” alisema Dk Bendera.

 

Mkuu wa wilaya ya Kiteto Tumaini Magessa, alisema matatizo mengi ya mkoa wa Manyara kuhusu migogoro hiyo ni kutokuwepo kwa matumizi bora ya ardhi kwani wilaya hiyo imetumia miaka 10 kusuluhisha migogoro na haijamalizika.

 

“Wilaya yetu imetumia miaka mingi mno kwa ajili ya kusuluhisha migogoro ili hali tungeweza kutumia muda huo kwa ajili ya kujenga madarasa, shule na kufanya maendeleo mengine hivyo tunapaswa kubadilika,” alisema Magessa.

Mkurugenzi mtendaji wa halmashauri ya wilaya ya Simanjiro Yefred Mnyenzi alisema inapaswa sheria, taratibu na kanuni (STK) zifuatwe katika utekelezaji kwani kuna baadhi ya watu wanamilikishwa ardhi bila kufuata utaratibu halali.

 

Mkuu wa wilaya ya Simanjiro Zephania Chaula alisema viongozi wa wilaya yake na wilaya ya Kiteto watakutana hivi karibuni ili kusuluhisha mgogoro wa ardhi uliopo kwenye kata ya Emboreet Simanjiro na kata ya Makame Kiteto.  

 

Mkurugenzi mtendaji wa halmashauri ya wilaya ya Kiteto Tamimu Kambona alisema wanakabiliwa na migogoro mingi ya mipaka kwenye wilaya jirani ikiwemo Kilindi, Gairo, Chemba na Simanjiro hivyo mkoa ushiriki kuitatua.